面試雜談 - Job Interview

我曾在Yahoo知識+為網友們解答HR問題, 很想在此作個小集合, 給些朋友作參考:

如果我份工係朋友介紹, 咁我答佢點樣得知呢份工, 應唔應該話佢知係朋友介紹呢?

另外, 我尋日先知道有呢份工(咁啱係Last day, 今日見 )所以我寫唔切Resume, 但其實我只是見summer full time, 咁無resume可以嗎？

答:
1. 您可以照實情講, 係朋友介紹, 但對方會問埋係邊位介紹, 咁您都要實話實說。

2. 睇您見甚麼工作才決定: 若然係做倉務、搬運和一些基層工作, 無Resume問題其實不太大, 但建議您問番您要去interview的公司是否需要其他學歷等證明; 但若然您係見文職和具規模的機構, 不論長工定暑期工, 就多數會睇埋您份Resume和求職信, 這種工夫慳不得。

另外, 想提醒您對方是否願意請暑期工呢? 公司打正旗號請暑期工無問題, 否則的話, 有些機構仍是想請個長工去填補空缺和減少行政開支(須知公司未必願意見到員工長期流失率大, 而且不論員工招聘和離職, 公司都要付出一定的時間和開支)。您要想想如果對方問您是否只是做暑期工, 您如何作答呢? 這一層, 筆者不是教您瞞著對方, 但您亦要想到這個問題。

至於如何寫Resume, 您可以在網上招聘website(例如明報JUMP和招職等)或者一些教寫Resume和求職信的工具書中, 參考有關format, 但內容則一定要寫番自己的資料, 不要搬字過紙。

*********

見文員....見工時駛唔駛著西裝......?
著左會否令成功機會大d...?

如果見細/大公司....著西裝會好d嗎....?

答:
見文員未必需要著西裝, 穿恤衫西褲黑皮鞋(最多加條領帶)就可以了。

當然, 見有規模的機構(如大型機構), 著西裝確實係較尊重。

不過, 著左會否令成功機會大d? 未必, 面試最重要的係應徵者的臨場表現(包括對答和做trade test), 學歷和工作經驗是否符合份工的要求。至於衣著和打扮, 配合番要應徵的職位, 整齊清潔就可以了;但切忌衣著不整齊清潔, 指甲有黑邊, 有汗味以及穿涼鞋(筆者公司的人力資源經理曾批評這樣做是只會扣了面試官的印象分)。

*********

有間公司用email 形式約我interview, 問我幾時上去佢office, 佢有留電話, 我應該打返電話俾佢好定覆email 俾佢好?
如果想有禮貌地回覆人地interview 時間, 英文應該點寫好?

答:

筆者建議您最好先打電話confirm對方, 問清楚interview時間、地點、是否需要帶學歷及工作證明文件正副本和相片, 以及屆時報到的話要找對方哪一位同事(如人事部x先生或x小姐), 然後才用email回覆。


您可以參考以下例子:

Subject: Re: Interview

To: XXX Company (your interview company)

Attention: Mr. xxx / Ms. xxx


Dear Mr. xxx / Ms. xxx,


Referring to your job interview invitation dated (the date that the company sent the invitation) and our conversation dated (the date you contact to the company), I confirm that I will attend the job interview of your company on (the date of interview) at (the time of interview).


Thank you for your consideration to my application.


Regards,


(Your name)

*********

我之前去見果間公司,叫我去second in...咁佢聘請我既機會大嗎?

答:
機會係有, 但別忘記還有些candidates同您一樣有被邀請做second in。


因此, 記緊保持鎮定和冷靜, 臨場表現不要太緊張, 趁interview之前, 好好做足準備(例如對未來工作的機構多作了解, 諗定可能interviewer會問的問題, 甚至可能會有trade-test等)和帶齊有關學歷等, 有充足的睡眠, 以及整理自己的儀容等。

*********

我想問下即係依家我本身都做緊文員架喇, 不過就想再去見下其他既文員, 咁見工果時如果問起(你原本都係做緊文員架wo, 咁做咩要黎見呢份文員既工呀), 咁見工者應該點樣回答比較好呢?因為我過幾日有一個見工既機會不過我怕人地會咁問......

答:
您當然唔會話您唔鍾意現時份工所以跳槽, 更加不會數落現時份工和機構的不是吧!

所以建議您若然係見工時, 問您:"你原本都係做緊文員架wo, 咁做咩要黎見呢份文員既工呀?" 您可以體面地回答: "因為做了一段時間, 想轉換一下工作環境, 接受新的挑戰; 見到貴機構聘請文員, 因為我本身都有文職經驗, 而且可以把我的工作知識和技能應用於應徵的職位上, 所以我應徵了"。

每間機構都想請番個工作紀錄較為穩定的應徵者, 若然見了兼簽埋僱傭合約才話唔做, 既浪費機構不少行政費用, 又浪費大家的時間; 因此若然您的工作紀錄不太穩定, 經常跳槽的話, 面試官就會問您"今次見工又係想轉換一下工作環境?" 咁您答的時候就要表現出您對份工的誠意, 因為某些原因才於某段時間需要轉換工作(例如機構裁員和臨時工等)。

除了對份工有誠意外, 見工前亦要好好準備, 放鬆心情, 面試官問您問題, 不要緊張和害怕被人問, 有技巧和從容地回答問題。

*********

我唔見晒啲証書及僱主推薦信....我真係唔知去晒邊.....請問會對我見工或工有手影響嗎??? 興幸既係我還有大部份正本.....我真係好唔開心............

答:
以筆者多年做HR的經驗, 解決的方法係有的:

1. 僱主推薦信/工作證明: 您可以問番您以前工作的機構幫您出番工作證明和僱主推薦信的, 當然會問番您的原因, 您就實話實說吧(例如搬屋時/因為一些意外遺失了); 大多公司的人事部係有副本和您的personal record去參考番的, 多數都會幫您寫的; 當然若然您以前的機構已經結業, 就只能以您當時的僱員合約加埋薪酬證明(例如報稅那張)去證明您的工作時期。

2.學業證書: 則要找回您當時修讀的學校/學院辦理補領手續; 當然他們一定會收費, 就當"破財擋災"吧!

至於如何見工, 或者可以給您以下意見:

1. 填寫Application form, application letter和CV時, 您可以填番這些資料, 但真的邀請您面試時, 於面試當日必須向面試的機構人事部和未來僱主(面試時)申明為何不能出示有關証書及僱主推薦信, 以及講明現時辦緊有關補領手續, 一收到就會補番這些Copies, 並向對方表示造成對方的不便作出致歉。

2. 於面試和trade test時, 保持番您平時工作應有的水準和鎮定, 不要太緊張和要對自己有信心, 證明俾未來僱主知您係有誠意和能力勝任做這份應徵的工作。

3. 有學業證書和工作證明固然重要, 但若然無好好的預備, 臨場發揮不理想和對份工作毫無認識亦是徒然。

副本雖然係得, 但人事部同樣要做vetting, 較難做cross check(我們的做法, 頂多係要打去相關機構查詢是否屬實), 所以必須做番補領正本手續(包括僱主推薦信/工作證明和學業證明等)。當然, 以面試官身份而言, 印象分會打了點折扣, 會覺得您很不小心; 若然面試時重申番您的良好工作態度, 可能會有點幫助。

所以, 請不要為這些意外影響您面試的表現, 除了作出補救外, 做好面試前的所有預備, 有充足的睡眠和放鬆心情去面試。

*********
請問見工面試之前使唔使做返個facial先？如果唔做0既話對個測試會唔會有影響？

答:
筆者做了面試官多年, 見人唔少, 或者俾以下意見給您:

1.) 做唔做facial, 同面試表現無直接或間接關係;
2.) 做唔做facial, 只係您的觀感和喜好問題; 做了可能會漂亮一點, 或者修復面部瑕疵, 但以面試官角度而言, 毫無關係;
3.) 反而係很多女士為了想爭取面試官注意而化了妝(有些很濃妝), 但只是看了會較精神, 同面試表現無直接或間接關係。

面試最重要的係應徵者的臨場表現(包括對答和做trade test), 學歷和工作經驗是否符合份工的要求。至於衣著和打扮, 配合番要應徵的職位, 整齊清潔就可以了(例如套裝, 恤衫加中/長裙子或褲子等); 女士們若然要化妝, 自然一點和望落去很精神就okay了; 但切忌化濃妝, 搽香水, 衣著不整齊清潔, 塗有色指甲以及穿涼鞋(筆者公司的人力資源經理曾批評這樣做是只會扣了面試官的印象分)。

*********

想問問interview時test English對話，
通常會問咩多，應該點答呢？？
我個人比較害怕English對答。

答:
見工前, 您可以先諗定以下以英語問的面試問題:

1. 試簡單介紹自己。
2. 你對我們公司有什麼了解？為什麼你想要來這裡工作？
3. 您本身有甚麼會計資歷? 懂甚麼會計的電腦軟件? 有甚麼工作技能?
4. 在你的人生中，你最滿足的成就是什麼？目標是甚麼?
5. 您有甚麼長處和短處?
6. 您有多少年工作經驗?公司為何要請您?
7. 我們的工作既瑣碎又多又刻板, 您會介意做嗎? 為甚麼?
8. 您如何和同事及顧客相處?
9. 若然公司要趕deadline, 需要您OT工作但No pay的, 您會做嗎?
10.您有無問題要問嗎?(問對方問題, 切記不要問及人工, 晋升機會和福利, 您可以問公司會否鼓勵進修等)

1. Please briefly introduce yourself.
2. Do you understand about our company? Why you apply this job / this company to work?
3. What is your accounting qualifications? Do you have any knowledge of accounting software? Any working skills you have?
4. What is your target / achievement in your life?
5. What are your personal strengths and weaknesses?
6. How many years of your working experience? Please give us reasons that why our company employ you.
7. Do you mind our workload is large and the work is routine and boring? Why?
8. How to deal with our colleagues and customers?
9. If we need to reach the deadline and request you to work overtime but no additional pay, will you do the job?
10. Any questions you want to ask?

怕自己臨場忘記的話, 建議您寫定篇個答案, 在家中記下一些重要字眼(但不是叫您去背書), 放鬆一些去記就得了。

當然, 明白臨場會有點緊張和比較少講英文, 其實您可以嘗試於平時練番講英文時流利一點會較好; 當然, 可能講得好快或者會"甩甩咳咳"放鬆番d心情, 慢慢講。

*********

見工果陣, 成日會俾人咁問: " 你做左唔夠一年, 做咩咁快轉工?"
同埋"你報緊d咩工?" < 我真係唔知點答, 同埋唔知點解佢咁問法..."
有冇人幫到我, 面對呢d問題果陣,應該點做?

先問番自己:

1. 你做左唔夠一年, 做咩咁快轉工? 做做下間公司倒閉? 裁員? 若然係, 可以向未來僱主講出實情。例如裁員, 主要係人手問題和公司資金有關。

2. 和同事/上司唔夾而辭職? 公司福利,薪金不太理想? 公司沒有晉升機會? 自覺自己不合適做本身的工作? 份工有問題? 定係自己出問題? 總共多少份工係出現返唔夠一年的情況。

如果係(2), 不是無辦法, 但要技巧地解釋(不是教您講大話)和表現您對份工的誠意。

首先你要了解你所面試的公司背景資料,你所應徵的職位, 然後就表現你自己能夠如何勝任這份工作; 面試時不應太在意你轉工頻密的理由, 反而是要了解份工, 面試官和應徵的公司。

當然, 有某些公司會執著於你幾年幾月幾日做過幾份工, 不斷追問您的話, 你就要表現得有耐性地去解釋; 雖則轉工頻密實是一個不好的紀錄, 僱主都會擔心你做得一年咁短; 但要表明您有心地做這份工作和對份工的熱誠, 俾信心給未來僱主(例如以前所累積的工作經驗, 是如何幫到您工作) 。

"你報緊d咩工?" 不太明白其含意(係咪:您還有申請其他工作嗎?), 但相信未來僱主問您呢個問題, 係擔心您係咪騎牛搵馬, 怕您找完一份又找一份工, 欠缺誠意。

您當然要告訴僱主知您到現時為止只係應徵這份工作(但實情完全不是的話, 筆者未必幫到您再瞞下去)之餘, 亦需要強調番對這份應徵的工作有誠意, 例如您可以話您面完試後再有問題, 可以隨時相約再面談等; 俾番僱主多d信心去聘請您。

*********

求職面試時問及家庭應如何回答？

答:
僱主問您呢個問題的背後動機係想知道您的家庭負擔有多大, 以及是否會涉及到公司的醫療保險等公司福利問題。

這個問題涉及個人私隠和家庭崗位, 除了要避重就輕外, 答的時候小心一點就行: 例如您可以話您的家庭人數, 包括甚麼人物(父母, 丈夫妻子, 兒女), 在學、工作、退休還是在家。

但若然問及家人健康的話, 除非因工作需要(例如投考紀律部隊), 否則您可以以個人私隠為理由, 婉拒作答。即使係這個問題關乎公司的醫療保險和員工福利, 公司應該在應徵者被聘請成為員工時才可以問及家人健康問題。

*********

關於面試辦公室文員的程序: 請問有關面試的程序,我未交任何履歷表,只係通過一次電話,
請問要準備些怎麼文件同程序......


答:

要準備:

1. 一封申請上述職位的求職信(記住要簽署)同履歷表;
2. 您的學歷及工作證明(正本), 如對方要求您俾埋副本, 您可以預先copy一份;
3. 身份證(正本): 用作核對, 到正式聘請您時才可以copy您的身份證;
4. 相片兩張(一張是屆時貼於公司的application form, 另一張作後備用);
5. 有關公司的地址, 您可以預先在地圖找出要見工的地點, 或者帶定本地圖(但最好係搵定先)。

最好的方法係可以預先問定那間機構的人事部, 還有甚麼資料和文件要帶。

一般面試程序(有可能大同小異):
1. 應徵者在預定時間到達後(建議您早15分鐘到達見工地點), 先向職員報到(例如公司的接待員)。
2. 職員會給應徵者填寫一份職位申請表, 應徵者填好後, 職員會要求應徵者取出學歷及工作證明正本以作影印(或者係正本加副本以便checking), 以及出示身份證以作核對之用。
3. 有些機構要求應徵者做trading test, 例如使用Word, Excel, 中英文打字和written test等, 會安排面試前或後進行, 視乎機構決定有關安排。
4. 完成(3), 應徵者會被安排安坐, 然後等叫名, 正式面試。
5. 面試時間多是10-30分鐘(亦有係較長的例子, 但面試時間長短與決定請哪位應徵者毫無關係)。
6. 面試完畢, 機構多數會話: 若有消息, 會於兩星期(或者三至四個星期)內致電俾應徵者。
7. 應徵者亦可於見工後俾封致謝信予有關機構(通常係人事部經理或者係面試官), 出的好處係給予人家一個好印象和強調自己係合適人選, 但出的壞處係有機會被有關機構棄置; 當然亦可以選擇不出此封信。

*********

英文自我介紹通常要幾多分鐘??
內容大概係講咩架??
有冇一個例子做參考呀??

答:
見工前, 您可以先諗定以下問題來介紹自己(either Chinese or English):

1. 我叫甚麼名? 您可以稱呼我係......(叫Ah x或者英文名, 但不主張用匿稱, 因為僱主會感到古怪和核突)。

2. 我的學歷程度。

3. 我的技能: 例如打字, 懂甚麼語言等。

4. 我的工作經驗(如有的話, 例如多少年工作經驗, 做開甚麼, 最後份工做甚麼等)。

5. 為何申請呢份工?

6. 對呢份工的期望。

7. 其他: 例如career expectation/aspiration和打算讀甚麼課程進修等。

為時約一分鐘, 講重點就可以。

怕自己臨場忘記的話, 建議您寫定篇稿, 在家中記下一些重要字眼和step by step去記講甚麼(用以上的7個points), 放鬆一些去記就得了。

講英文講得"甩甩咳咳"係會扣分的, 所以平時練番流利一點會較好; 當然, 明白臨場亦會緊張, 可能講得好快或者會"甩甩咳咳"; 放鬆番d心情, 慢慢講去來。每間機構所問的問題不同, 但一般而言, 面試會問:
1. 你對我們公司有什麼了解？為什麼你想要來這裡工作？
2. 在你的人生中，你最滿足的成就是什麼？
3. 您有甚麼長處和短處?
4. 您沒有工作經驗, 公司為何要請您?
5. 我們的工作既瑣碎又多又刻板, 您會介意做嗎? 為甚麼?
6. 您如何和同事及顧客相處?
7.你有無問題要問嗎?(問對方問題, 切記不要問及人工, 晋升機會和福利, 您可以問公司會否鼓勵進修等)

*********

想要一些面試時的問題、特別是一些小組討論及有關入職管理階層的問題

通常會問(both individual & group interview):


1. 您有多少年實際管理經驗? 詳細做甚麼(如staff supervision)。

2. 有無遇過一些管理上很棘手的個案? 如何解決?

3. 有無遇過一些管理上您處理得不太好的個案?

4. 公司會俾一個case study給您(和您個group), 講下您的意見和解決方案。

5. 若然公司要裁員, 您要執行有關指令, 您會如何做?

6. 您為何會覺得自己適合做管理的工作?