My First 10K - Runner No.: K1177

未交代下我最終是否要上城巴之前, 講下花絮先。

雖然我係第一次參加十公里馬拉松, 但志在參與, 心情唔係咁緊張, 反而驚自己屆時唔識起床, 較了兩個鬧鐘方便起床; 不過, 當晚睡得唔多之餘, 還有一個"人肉鬧鐘"----思媽叫我起床, 因此凌晨三時半便起床, 約四時多出門(還有思媽送我到港鐵車站, 她話係治安問題, 不過我又覺得呢種係支持我的表現)。

站在月台的我, 以為我係少數早起跑馬拉松的傻人; 但我去到九龍塘的港鐵站月台後, 就發現傻人不只我一個。

去到金鐘港鐵車站月台就更糟了, 不少參加者排著等列車上天后站, 塞得列車如平時繁忙時間上車去趕著上班一樣。

早上約五時多出閘到天后站B出口, 嘩! 好多參加者呀! 唔止, 很多參加者看起來好精神(我當時都係咁), 有些吃著香蕉, 有些在熱身, 有些男參加者還當眾換上車(按: 諗極唔明, 因為有不少流動廁所, 但可能照明不足吧), 但天后站B出口附近整條街道, 已經熱鬧得很(不過唔算嘈吵)。

放下行裝, 然後係吃著香蕉(無錯, 仲要係兩條呀!), 以及做三十分鐘的熱身運動, 六時十五分開始行去起點站。

到了起點啦! 一路上半行半跑, 但起初無風, 整張面變得漲紅又大汗, 後期就好好多, 感覺舒服; 整段路程有高有低有暗斜, 所以不能一味係咁跑, 有些用多點氣力的地方就最好係走路; 途中有幾個水站, 灌了些水兼潑上面部降溫(但係去到最後一個水站, 明明有ISO-Tune, 點知俾人飲晒!)。

講到呢度, 估下我能夠完成10K呢?










我在兩小時內跑畢全程10K, 唔駛搭城巴呀!


今次的10K, 雖然完賽後雙腳仲係好痛(好彩無抽筋), 但係得著的倒也不少:

1. 三萬多人和自己一齊跑, 很齊心一致, 好開心(若然有些bloggers同朋友和我約埋同一時間和賽程跑的話, 就更完美喇)。

2. 跑10K期間, 發現香港由天黑變天光的景色, 真係好靚, 感覺很美好。

3. 跑到城市花園, 有居民向跑手們揮手支持, 甚至跑入終點, 周圍不少人吶喊支持, 感受到很幸福和"I'm never run alone"。

4. 之後同家人和有些同事提起我完成10K, 得到不少讚美(包括我的新頂頭上司)。

5. 跑完之後, 氣血運行好了許多, 學on dog兄話齋: 跑埋個運氣出泥呀!

6. 雖然如此, 要完成呢次賽事都要付出一定代價----包括事前練習, 賽前睡得唔夠,賽後大休息和之後腳痛。

明年會否再來呢? 等我收到7月的消息才決定了。



代郵七十姐姐: 收到話當日9時飲茶的信息, 已是翌日中午了(況且前一晚已於晚上十時就寢, 因為要三時半起床), 請問可否再相約呢?

我要跑完10K!

非常期待這個星期日----因為一年一度的渣打馬拉松又來了!

今年我是首度跑十公里(10K), 係33,000跑手之一; 心情幾緊張下, 既要唔好俾自己病或者受傷(尤其雙腳), 又要開始計劃當日何時起床和執拾行裝等。

思媽初時反對我去參加, 但我只會半行半跑, 最終都支持了。

雖然由報名參加的一刻(08年9月尾)開始, 每星期一次練跑一小時, 但期間有些星期係沒有練到, 不是自己有病, 就係早上有事要做。

我的目標很簡單----在兩小時內完成10K就得了。

要面對的係當日預測天氣會回暖, 濕度較高, 可能對跑手有點影響; 以及會否懶床遲到。

原來仲有人和我一樣參加呢:

On Dog兄
肥龍兄
Samsara
Bacakara

想在當日向我打招呼? 我係跑早上6:30的一組, T-shirt未諗定, 但會戴上深藍色白色有"N"記商標的冷帽, 淺藍色K記波鞋, 號碼牌係K1777。

09.02.2008, 一早見!

恭賀新禧!送鼠迎牛! Happy Lunar New Year!

今天是大年初一, 嚴格而言係要過了立春(即係2月4日)才算送鼠迎牛, 不過這也不打緊, 大家開心迎接農曆新年就行了。



在此我祝大家:

身壯力健!
萬事如意!
心想事成!
女士們青春常駐!
男士們朝氣充沛!
上班族繼續有工開!
學生們學業大躍進!
恭喜恭喜!

雜記 (六)

有人辭官, 歸去......

上星期, 一共吃了兩次farewell lunch: 一位係醫學工程師, 而另一位就係我的頂頭主管。

這兩位人物, 雖然入職時間不同(一位只不過三年, 另一位就不止三年), 但巧合的係同一個星期返最後一日工(即係last day), 以及各自對自己的部門, 有著不同的意見而離去。

我係直屬那位頂頭主管, 而那位醫學工程師一直幫手訂出儀器的標準(specifications)和提供專業意見, 因而有所關連; 但畢竟在公營機構, 少不免有些官僚作風、機構文化差異、人事衝突不和以及不同程度的掣肘等, 不一定在大型機構工作過的員工可以適應和接受。

尤其是我那位頂頭主管, 決定離開這個部門和機構, 對他而言簡直係一個大解脫: 他未滿合約前那半年, 起初係無咁準時返工(即係9點半前)但會準時收工, 之後呢, 一係就打電話請假(病假或大假都有), 一係見親都是"無厘神氣"的樣子, 早上十時前返工, 未到中午就已經"閃"; 最離譜的係試過早上十時後竟然沒有致電回公司, 由於不知我們的部門一哥會否找那位頂頭主管, 最終要透過我的直屬上司找他(試過叫我們不用向部門一哥報告, 但咁做等同"當老闆無到"有何分別? 於是亦回了這句話:"您唔好令d細o既難做啦!"); 身為阿四的我, 對於這位差不多"名存實亡"的頂頭主管, 可以做的係提醒我的同組同事和上司有甚麼文件, 又或者有同事要找他時, 就要趁他還在辦公室時簽名或者約見。

那段日子, 於我和我的上司、同事而言係一件無奈的事, 或多或少造成自己的團隊(team)的形象和士氣低落; 眼見他意氣難平(例如:被其同級同事排斥和做事不太順意等), 其實可以做甚麼呢?

至於那位醫學工程師, 離職後應該有"著落"; 但我那位頂頭主管, 從我和他的last informal talk, 語氣很灰, 有少許預感他仍未找到工作。

祝願他們早日找到工作, 工作順利。

*************************************************************************

醫療一二事

先申報利益: 本人乃係該公營機構的員工, 但以下我所表達的意見, 不代表該公營機構之立場。

接連有兩件醫療事故發生, 加上壓力團體批評醫管局高層在此時竟然得到加薪, 他們一定頭痛不已。

醫院門外失救事件


在明愛醫院門外失救事件中, 行政總監於第一次記者會上沒有向死者家屬致歉, 固然令人氣憤; 然而, 作為讀者, 不是當事人或者目擊者, 究竟那位支援服務助理(按: 到依家仍然仲有人話係文員!要知道這個職位其實未必等於文員, 雖然職責差不多, 但單係薪酬, 兩者可以相差很遠。)是否如死者兒子所言話: 「唔關我事」呢? 還是用另一種說法呢(例如:「唔好意思, 呢d我地幫唔到手噃!」, 弊在若然對方覺得對方好似無乜誠意, 可能會變成「唔關我事」。)? 其實當事人是如何說呢? 但她在此件事上受盡「千夫所指」, 要她再面對此件事甚至面對社會輿論, 恐怕她會承受不了。

近日頗多朋友如CM和三點都有講開這件事(按:三點係用另一種方法講, 然而應承過她那篇回應不可轉貼, 所以不打算quote了), 或者以我----這個曾經以service contractor身份在醫院工作了超過五年的人, 所見所親身經歷的, 給大家多一點思考和啟示:

在差不多在醫院的範圍外發生事故, 是否要打999叫白車呢?

曾經有如此的案例: 有位外來的年老病人, 在離醫院(按: 北區醫院)差不多幾步的「巴士站」跌倒, 病人當時還清醒, 剛巧有人經過見到, 就立即到醫院找護士求救(最近醫院門口的部門就是眼科, 於是途人就找一名眼科護士幫手), 而那位護士就致電給清潔及運輸組----我的舊公司(乃係一間外判服務公司), 要求派一名同事和一張吉的輪床, 幫手一同推那位病人上急症室; 有點印象的係那位同事和我講番件事: 她說當時那位病人登記後就已經分流到護士站, 據講係那位眼科護士有致電俾急症室登記處, 但沒有打999叫白車。

當時在那間醫院工作了如此久, 卻從未見過醫院向外判商或在醫院裡長駐工作的非醫管局人員(例如外判的保安人員和職員餐廳員工)給任何指引(包括任何形式的書面文件), 關於遇到上述突發事件要如何處理。假設明愛件事發生在北區醫院身上, 兼且當中涉及有外判商或在醫院裡長駐工作的非醫管局人員, 但一直沒有指引, 您可否想像會如何呢?

下次遇到上述相類的事, 咁可以點做?

最穏陣的做法係不但要打999叫白車, 而且找一個適當的人幫手; 記住, 係找適當的人幫手。醫院有不少人走動, 找外判職員不是不可以, 而係可能要搞一大輪野(簡單講: "不到位")和對緊急救援欠缺經驗, 分分鐘會錯失黃金救援時機; 找counter的人(不論係文員還是支援服務助理, 即係GSA)呢, 可能大家會因呢件事而有陰影, 當然亦不能"一竹竿打一船人", 若然係碰到醫生或者護士的話, 就立即叫他們幫手(不論係施救, 找多幾個醫護人員還是致電急症室)和致電急症室, 以便爭取時間搶救。

有指引, 固然好, 但指引始終有不合時的時候, 若指引不與時並進或僵化, 員工對指引的態度處於兩極(一係冷淡, 一係過份依本子辦事), 指引只是一個用來開脫員工做錯事的工具而已。

這件事, 反而教曉我們如何提高"執生"和"多做一步"的能力。


嬰兒遺體遺失事件

呢件事, 真係好心痛。

執筆到止, 那個嬰兒遺體找不到, 猜想到一些事, 但仍在調查中, 恕我不能講我猜想的那回事。

當然, 假若物資來貨剛巧有一段時期不足, 又或者發生在中型醫院身上, 有護士致電上電台phone-in節目話有咁樣做, 就有如此的可能性。

至於兩個遺體放在一個屍櫃, 通常稱為"孖鋪"; 一個"醫院大酒店"(殮房的雅號)多有四十多格屍櫃, 若然撞正"高峰期"(例如中國人大時大節前後), 一時間上天堂的多或者外來"大酒店"(即係殯儀館)未安排送那些"人"到"大酒店", 屍櫃就出現不敷應用的情況, "孖鋪"就應運而生。

有人話處理那具嬰兒遺體的袋是一個黑色垃圾膠袋, 是否真的如此, 我不打算再深究; 但我想分享我當時任職醫院清潔及運輸之外判商時, 曾經親自運送遺體的程序, 以下內容可能會導致讀者情緒不安, 不喜勿看; 若然讀者因看以下內容導致情緒不安, 筆者恕不負任何責任。

一般而言, 當接到病房話要"執糖"(又稱"送dead body", 因為當護士和健康服務助理們處理好遺體, 包好的形狀似一粒糖, 因而得名), 通常會找二人甚至三人(尤其係那個"人"是體型稍胖的話)由"醫院大酒店"拿一架"勞斯萊斯"(運屍車的雅號)上去有關病房執行有關工作; 送上"車"前病房護士會先核實那個已包好遺體之銀色屍袋外的小牌子之資料(包括人名和身份證號碼), 是否與遺體所戴的手帶的資料是否一樣; 不論老幼都是用銀色屍袋, 外面的人看不到銀色屍袋內那個"人"----除非打開屍袋拉鏈; 然後合多人之力和床板(一塊膠造的板, 用來transport由病床到"勞斯萊斯")把那個"人"送上"勞斯萊斯", 用一塊布(一塊灰色大膠布或大織布)蓋著"勞斯萊斯", 然後送去"醫院大酒店", 找個吉的屍櫃安放和填寫資料(例如病人的名稱, 病房和所放的屍櫃編號等), 才算完成。

是否有人疏忽和不小心, 待完成調查才算吧。

要補救的話, 除了安裝閉路電視外(但係大家又會話: 可能會影到那些東西呀!), 每日點算和加強員工之工作培訓, 才可以避免案件重演。

無論如何, 希望上述兩個家人能節哀順變。

PS: 感謝以下朋友的看法, 才使我決心寫下。


延伸閱讀(排名不分先後):

肥醫生: 痛罪性之劣頑　悲人性之泯滅
棉花糖: 過得自己
篤撐兄: 拆彈成功
Inhuman Resources: 從（我的）管理角度看失誤
騏: 轉載別人的良知

補貼--聖誕交叉扑之聖誕節兩個小故事

原來我那篇交叉扑放在Miss D度, 感謝之至!

聖誕雖已過, 但係當平時笑話都可以的。

--------------------------------------------------------------------------

聖誕交叉扑之聖誕節兩個小故事

一

聖誕老人同佢老婆(下稱夫人)正在商議買禮物事宜。

聖誕老人話: 「今年照舊買二千份禮物俾甲鎮的小孩子吧。」
夫人話: 「咁要幾多錢? 」
聖誕老人話: 「每份照舊70元啦! 」
夫人話: 「有無搞錯呀? 上年每份都係駛70元, 前年仲係80元呀! 」
聖誕老人話: 「衰婆! 我被銀行d小妹妹誤導我, 將大半份身家俾o左雷曼兄弟, 無o左! 您仲衰, 您今年買o左副G記眼鏡, 兩個LV手袋, 同埋投o左隻全球一千零幾隻白松露菌, 但衰在食一餐就無; 仲有, 平時買餸間唔中打斧頭, 我都無同您計, 您仲好意思叫我俾多d? 信唔信扣您平時駛費呀嗱!」
夫人: 「…...」

(聖誕老人的真面目和真人生活原來係咁…講錢真係失感情。)

二

有兩隻聖誕鹿仔趁聖誕老人開「車」前閒談。

鹿仔甲: 「喂! 衣排唔見貓女”阿豹”o既? 仲想送份聖誕禮物俾佢開心下。」
鹿仔乙: 「算喇! 佢應該唔會蒲頭見您喇! 」
鹿仔甲: 「點解呀? 」
鹿仔乙: 「聽路邊社講, 佢就泥結婚呀! 衣排潛o左水未見影呀!」
鹿仔甲: 「吓? 早排佢唔係俾佢相識十九年的男朋友賤狼飛o左咩? 仲有, 賤狼唔係被一班狗仔見到佢同o個隻小狐狸一齊去酒吧又蒲又咀咩? 賤狼淨係成日黏食黏住阿豹, 身為名種狼個仔但又不事生產, 點解唔駛一個月阿豹就應承同賤狼結婚? 」
鹿仔乙: 「唉! 佢十成十犯賤, 實俾賤狼用甜言蜜語氹掂啦! 如果賤狼結o左婚又走去偷食, 搞到要同阿豹離婚, 阿豹會被賤狼分佢身家o架!」
鹿仔甲: 「唔得, 我要做野! 」
鹿仔乙: 「 咁您想點呀? 想搶佢做您老婆? 寫大字報?您小心噃! 賤狼試過用賤口唱衰明朝馬唱足三年, 搞到明朝馬要去隔離村至搵到啖飯食兼成家立室, 查實明朝馬當年只不過話欣賞阿豹之嘛。」
鹿仔甲: 「哈哈! 您唔駛驚噃! 」
鹿仔乙: 「咁您有乜好橋呀?」
鹿仔甲: 「您幫手同我將架鹿車夾硬泊阿豹同賤狼同居的地方, 話就話送禮物, 查實屆時除了出動我多年來臭唔可臭的口氣同鹿角氣摧眠隻賤狼外, 仲會用無敵撩陰毛腿踢賤狼個重要部位, 咁唔單止要賤狼求生不得求死不能外, 仲要整到佢以後無得偷食! 我要替天行道! 我要保護我的女神!」
鹿仔乙: 「(心諗) 賤狼警覺性咁強, 希望鹿仔咁做唔係天真唔係傻啦!」

(原來動物的世界同人類世界都係相差無幾, 一樣對感情事搞到好複雜; 故事個結果仲未知, 先祝鹿仔甲好運囉!)

最後, 筆者祝大家聖誕快樂!

--------------------------------------------------------------------------

1st Day - Year 2009

今日係二零零九年一月一日, 祝大家"合皮扭耳(Happy New Year)"!

聖誕交叉扑 - 後記

先講這篇聖誕交叉扑後記係我寫的, 而前篇交叉扑係有位blogger寫的, 大家可以自行從那50多位參加者中估下是誰寫的(當然, 有人自行踢爆身份就另計)。

首先, 向那篇交叉扑的blogger講些話: 先行向您致歉, 由於我發現有錯別字(按:找到三至四個), 於是出文前替您改正那些錯別字和較為廣府口語化的字(如: o既); 又, 幫您加番個"唔"字(按: 在後段的一句話, 加了個字就和之前的句子相呼應和有連接性), 盡量保持文章的原意。

如果因是次修改而令您不安, 謹此送上最深的歉意。

--------------------------------------------------------------------------------

希望各位不論有否參加"聖誕交叉扑"的朋友, 睇得開心和"過癮"!

Finally, Wish you have a Merry Christmas!