真係寫唔切, 呢期在別人的博客度講立法會講好多好多東西(證明本小姐口水多過浪), 幾乎連自己原本要寫的都忘記。
有人寫到200篇啦!我呢?100篇都未到!
不過, 有心情唔係好忙的話, 又或者心理上想躲懶的時候, 會動筆。
寫blog, 係唯一不會逼自己的活動。
各位, 那篇講換血加job rotation續篇, 欠住先, 月尾前見。
又, 呢期不少博客弄到負能量和怒氣充斥, 趁住這個中秋節, relax!
********************************************************
賽後檢討: 地區直選
又講地區直選的賽後檢討。
一直相信鐵票的威力, 雖然有一批有力之士大力襄助, 奈何都出現幫倒忙的情況; 不僅菜菜子要暫別立法會, 依家仲發展到建制派內因為本是富貴黨之鄉事派巨頭皇叔幫第一大黨之鄉事人士拉票, 導致某黨在地區直選慘敗兼全軍覆沒, 弄到互相狗咬狗骨; 雖然皇叔自動退黨, 但相信件事應該無咁快完----因為富貴黨的前主席大少和前副主席天氣女郎, 打算向上大人告御狀, 但係第一大黨的前主席鼠頭曾就隔空向對方反唇相譏。
當然, 富貴黨的副主席天氣女郎曾出任某公營機構主席, 期間爆了單批盪女要員用公帑買一家保險事件, 加上富貴黨反對立法最低工資和工時, 違背民意, 亦非完全係有人吃裡扒外一事咁簡單。
那邊箱, 玫瑰聯盟三俠取得議席, 尤以初次下海的顚狗黨魁高票當選力挫大狀黨馬尾毛值得各方留意, 之前狂轟建制和泛民, 又話顚狗入立法會係特首的惡夢, 但卻放聲氣聯合泛民力抗建制派, 孰真孰假, 真係令人期待。
哈哈!真精彩!大家買定花生睇好戲!
至於新界東, 那位曾做特首特別助理的第一大黨的第二梯隊勤哥, 勝出後接受傳媒訪問, 點知一講英文就出事(video版好多人都睇過, 今次終於有人評論下那位人兄的英文, 而且身為中大碩士生, 語言能力應該有番咁上下, 點知原來傳聞那位人兄所寫的英文成為政府總部上下佳話)!
真係要好好練習, 甚至學番點寫好英文同講英文, 唔好講錯字(可能係太開心, 或者太緊張所致), 成日er, er, er。
至於泛民, 雖然保得住廿三席和社工黃高票重返議席, 但譚師奶和鬍鬚張落馬, 疑似兩面人的波哥, 葉師奶和鼠王芬的掘起, 未來政局將多變數。
********************************************************
悅。餅。
每年中秋, 總有親戚送月餅, 不過, 我每年都會自掏腰包買月餅給家人。
今年我買了奶皇月餅, 本來九月頭訂了尖沙咀P字頭酒店加輪留的奶皇月餅; 一來出名好食, 二來用唔駛200元的價錢(按: 一盒盛惠$198)就可享用五星級酒店的美食; 點知當日(9月3日)下午回覆話: 今年用來做月餅的材料Order已經用晒啦! 吓!當日只係八月初四噃! 仲未到初九, 就話買晒喇!
最後, 我買了對面街的九記奶皇月餅, 網上的評論話月餅係人手做的, 味道和質素同P字頭酒店相差無幾(據悉係同一個中菜部姐妹酒家), 加上每年有台灣旅客買它做手信, 上年開售後一早沽清, 於是在9月4日用傳真方法訂餅, 成功了!
月餅盒, 頗傳統
一盒八件
餅面有「龍」字
味道: 有粒粒蛋黃和奶皇香味, 但易碎; 若然把月餅放微波爐內「叮」15秒, 熱食卻感覺不到奶味。
購買心得:
1. 愈早訂餅, 買到的機會較大。
2. 奶皇月餅買到後, 儘快回家和放入雪櫃, 原因係多數奶皇月餅不加防腐劑。
3. 不是所有奶皇月餅要放微波爐內"叮"15秒才好吃, 其實放在室溫2小時後食用, 味道亦相差不遠。
4. 未必大量購買就"有著數": 加輪留的奶皇月餅雖然寫明20盒或以上才有折扣, 不過若然持有該酒店的AE咭, 買一盒奶皇月餅已經有七五折。
此外, 同場加映新派月餅:「臀部月餅」
盒面像小型日曆
盒內說明「八月十五」的由來
原來這個月餅係雙手拍股的, 它叫「自摸」
宣傳照片
圖解四款「八月十五」的命名:用上四種大家都耳熟能詳的「麻雀用語」﹕全股上場的「清一色」、穿上T-Back的「單吊」、雙手拍股的「自摸」及露出半股的「爆棚」, 真係爆笑。
最後, 祝大家家好月圓。中秋節愉快! 一週過後再見。
